Wy Lubbert Turck b. richter tot Weesze Remmert van Heechray Willem Heymerix, Jan Hamss schepenen
ind voirt wy gemeynde schepenen doen konde ind tuygen myt desen apenen brieve, dat voir
onss als voir eijnen sittende den richter ind eynre gespander banck komen is, Derick Schenck van
Nydegen etcetera ind heeft myt synen eygen vrien moetwille gesond lyffz ind myt opsattinghe bedachten
voir raet an handen des richters vurgenant voir op gedragen ind nae dair op vertegen als recht wass
myt hande, halm ind monde, den hoff by Hoest in den vurgenanten kerspel ind gerichte gelegen ter Nihrsen
begeyren volkoemeliche ind uit den gronde voir eijn eygen erve gegeven heeft myt syne alinghen ghe-
was dair op staende. Dair niet aen uitgescheiden van stonden aen sulx aengevangen besitten genotten
ind the gebruycken onbecroent als tot eijne ewijghe behoeff dat tsemenlicher naturliche kynderen
die die vurgenante Derick Schenck van Nydegen by Aleijden synre maecht gehadt heeft. Ind die richter
vurgenant heeft dat vurgenante guet ind erve myt den ghewass voirt opgedragen ind nae den lantrecht
gevestiget, soe dat die schepenen vurgenant voir recht wysden dat die vurgenante Derick Schenck van
Nydegen ind synre erve, dairvan onterft, onrechtiget sal syn ind bliven ind die vurgenante naturliche kynderen
myt der moeder oir leven lanck dair aen geerft, gerechtiget, ind geguet sullen syn ind myt recht altoess
bliven. Ind dat oick in voirwerden nae bescreven dat die vurgenante naturliche kynderen myt oirer moeder
den vurgenante erve, guet ind jairlichen gewass vurnant nae ind gelycken deijlen sullen myntliche inde
fruntliche, ind en sullen oirer moeder in geenerley wyss tot oeren aendeel, soe lange sy aver ind levet,
hynderliche noch schedeliche wesen. Ind dat eyn kynt sal nae synre doet opten anderen erven nae

den lantrecht, by alsoe dieselven sonder echte geboirt van den leven ther doot komen weet hent tot
den leste lyve thoe. Sonder alle argeliste in oirkonde der wairheit heb ick Lubbert Turck b. richter
vurgenant mynen zegel voir mij ind wy schepenen vurgenant onsen gemeynden scependomss
zegel von ons mede aen desen apenen brieve gehangen hebben Gegeven in den jair ons heren
duysent vyffhondert ind negenthien altera Divisionis Apostolorum